സ്വപ്നങ്ങൾ അവ്യക്തമാകുന്നു

സിരകളിൽ പടർന്നുകയറുന്ന
നനുത്ത സംഗീതം ചില നേരങ്ങളിൽ
തലച്ചോറിൽ നിന്ന്
അശുദ്ധ രക്തത്തെ തള്ളിമാറ്റുന്നു.

പ്രണയത്തിന്റെ താളക്രമങ്ങൾ
മറന്നുപോയ ഹൃദയത്തിന്
ഉൾക്കൊള്ളാവുന്നതിലും അപ്പുറമാണത്.

ഒറ്റവരികൾ എന്നെ നോക്കി പല്ലിളിക്കും മുൻപ്
താക്കോൽപഴുതിലൂടെ അളന്നെടുക്കാവുന്ന
ചില കാഴ്ചകൾ ഞാൻ കരുതി വച്ചോട്ടെ.

ഒരു തെച്ചി ചുവപ്പണിയുംമുൻപ്
ഒരു മുല്ല തളിർക്കും മുൻപ്
ഒരു മാരിവില്ല് വാനിൽ വിടരും മുൻപ്
ഞാനൊന്നുകൂടി മയങ്ങിക്കോട്ടെ

മഴ ഇനിയും പെയ്യാനുണ്ട്
ഋതുക്കൾ മാറാനുണ്ട്
ചില നക്ഷത്രങ്ങൾ തെളിയാനുമുണ്ട്.

സ്വപ്നങ്ങൾ അവ്യക്തമാകുന്നു
ഭൂമി ഉരുണ്ടുതന്നെയിരിക്കുന്നു.