ഒരു കര്‍ക്കിടകം കൂടി

പലനാളുമുമ്പൊരു
പുഴയുണ്ടെതിലൊരു
ബലിവറ്റുനല്‍കിയ കടവുണ്ട്

കടവിന്‍റെയോരത്തു
നെല്ലോല മേഞ്ഞൊരു
കുടിലുണ്ടതിലെന്‍റെയമ്മയുണ്ട്

അമ്മതന്‍ നെഞ്ചിലെ
തീക്കനല്‍കൂട്ടിയ
ചോറുണ്ട് ഞാനെന്ന ബാല്യമുണ്ട്

പുസ്തകത്താളിലെ
പെരുകാത്തപീലിപോല്‍
ഉള്ളിലെനിക്കെന്‍റെ സ്വപ്നമുണ്ട്

പാടമൊരുക്കും
വിതയ്ക്കുമായന്നമ്മ
ചേലില്‍ച്ചമയ്ക്കണ ഗാനമുണ്ട്

ആ നോവുക്കേട്ടിട്ടങ്ങാ-
കാശക്കോണിലെ
മഴയൊന്നുചാറിപ്പരക്കണുണ്ട്

മഴപോയനേരത്തു
നെറ്റിയില്‍ചുംബിച്ചെന്‍
അമ്മയും ദൂരെ മറയണുണ്ട്

കോളുണ്ട് കര്‍ക്കിടക
പെയ്ത്തുണ്ട് പിന്നെയും
വാവിനൊരു വറ്റുമായ് ഞാനുമുണ്ട്

കടവില്ല അമ്മതന്‍
നെഞ്ചിലൊരുപൂവിടാന്‍
തിരകള്‍ക്കുമേലെയെന്‍ പ്രാണനുണ്ട്

പെയ്യട്ടെ പൂമഴ
അമ്മതന്‍ ശീലുമായ്
ഞാനെന്ന സന്ധ്യയും ചോക്കണുണ്ട്.....
ഞാനെന്ന സന്ധ്യയും ചോക്കണുണ്ട്.....