ചില കള്ളങ്ങള്‍

എന്നെ ചൂണ്ടി
നീയെന്നെന്നെ നീ വിളിക്കുമ്പോള്‍
നിന്നെ ചൂണ്ടി ഞാനും
നിന്നെ നീയെന്നു വിളിക്കുന്നു

രണ്ടു ശരീരങ്ങളുടെ
ഒരേ തലങ്ങള്‍
നീ ജനിച്ചതുകൊണ്ടാകണം
ഞാന്‍ നിന്നെ പ്രണയിച്ചത്
ഞാന്‍ ജനിച്ചില്ലായിരുന്നെങ്കില്‍
നിനക്കെന്നെയും പ്രണയിക്കാനാകുമായിരുന്നില്ല
അപ്പോള്‍ പിന്നെ
പ്രണയമെന്നത് നീയോ? ഞാനോ?

സ്ഥിര സംഭവ്യമായ
പ്രകൃതിയുടെ മായയില്‍
സ്വപ്നജാലം മാത്രമാണോ ഈ പ്രണയം.
അല്ലാതെ പിന്നെ,
നീയും ഞാനും എന്നത്
നിലനില്‍ക്കുന്നതേയില്ല.

പ്രണയം പലയാവര്‍ത്തി വന്നുപോകുന്നു.
ധ്യാനാവസ്ഥയിലും രമിച്ച്
സുഷുപ്തിതന്ന്
പ്രണയം പ്രപഞ്ചോത്പത്തിമുതല്‍
സ്ഥിരധാതുവായി
ഓരോ അണുക്കളിലും വ്യാപരിക്കുന്നു.

അപ്പോള്‍പിന്നെ
എനിക്കു നിന്നോട് തോന്നിയതോ
നിനക്ക് എന്നോട് തോന്നിയതോ
പ്രണയമല്ല..
നീയാണ് പ്രണയം...!
നീ പറയുമ്പോലെ ഞാനാണ് പ്രണയം!

നെഞ്ചില്‍ കൈചേര്‍ത്ത് കണ്ണടയ്ക്കുമ്പോള്‍
ഞാനും നീയും പച്ചകള്ളങ്ങളാകുന്നു.