പ്രണയം

കരിമുകിലേയെൻറെ കളിയോടമൊന്നിനെ
നനയിച്ചിടല്ലേ നിൻ മിഴികളാലെ
ഒരു തേങ്ങലായൊരു വിരഹം നീ പെയ്യുമ്പോൾ
തണുവറിഞ്ഞീഭൂമി പ്രണയമാകും

കുളിരല കൈകളിൽ ചേർന്നൊരു മൃദുകാറ്റെൻ
മനസ്സിലായ് കുളിർമഴ പെയ്തിടുന്നു
ഹൃദയത്തിൽ പെയ്യുമാ പ്രണയത്തിൻ മധുഗാനം
ഒരുവേള നിൻശ്രുതിയായിരിക്കാം

നിന്നുള്ളം മെനയുമീ നൂൽമഴ പന്തലിൽ
നനയുവാനെന്നെന്നുമെൻറെ മോഹം
വേനലിൽ ചിറകറ്റു പോയ കിനാക്കളെ
കരിയില പുതനീക്കി കൂട്ടുവായോ

തരളിത മോഹത്തിൻ മധുര സ്മരണയായ്
ഒരുതുള്ളി മഞ്ഞു നീ തന്നുപോകെ
പോയ വസന്തത്തിൻ നിറമുള്ള പൂവു ഞാൻ
കനവിലെ വിരഹമായ് കാത്തുവയ്ക്കും