ആന

ഇടനെഞ്ചിലുടയുന്ന മോഹത്തിൻ മീതയീ
ഇരുളിൻറെ ചങ്ങല നീ മുറുക്കേ
വനമെന്ന ചിന്തയെൻ ഹൃദയത്തിൽ നിന്നഹോ
അകലുന്നു വീണ്ടുമീ തെന്നലെത്തേ

പുരപ്പറമ്പിലെ ചെണ്ടകൾ തീർക്കുമീ
താളപ്പെരുമ്പറ ചോട്ടിൽ നിൽക്കേ
പലകുറിയുള്ളിലെ നോവുമായെന്നുടൽ
ഗതിവിട്ടു മെല്ലെയുലഞ്ഞിടുന്നു

ഒരുചില്ലയില്ലയീ പൊരിയുന്ന വേനലിൻ
ദുരയൊന്നു മെല്ലെ കുറച്ചുവയ്ക്കാൻ
മദജലം പൊട്ടി പടരുമെൻ സിരകളിൽ
കുളിരുമായ് പ്രണയത്തിൻ തേരൊരുക്കാൻ