മഴ.. പെയ്തുകൊണ്ടേയിരിക്കുന്നു

ഒരു മഴ
അതു അടര്‍ത്തിയെടുക്കുന്നത് 
ഒരു ദാഹത്തെയാണ്

വിണ്ട ചുണ്ടിലെ
പെരുമഴക്കാലങ്ങള്‍
നേര്‍ത്ത നോവുകളായി
യോനീ നാളികളില്‍
ഹരിത മുകുളങ്ങള്‍ സൃഷ്ടിക്കുന്നുണ്ട്.

തെരുവുമറന്നുപോകുന്ന
ചോരപ്പോടുകള്‍
ഒപ്പിയെടുത്ത് ഹൃദയത്തോട്
ചേര്‍ക്കുന്നുണ്ട്.

ചില സ്ത്രീകളും
പെയ്തുവീഴുന്നുണ്ട്
ഞെട്ടറ്റു പോയൊരു
മാംസപിണ്ഡത്തെ
തപ്പിയറിയുന്നുണ്ട്

ഇരുട്ടിനെയാവാഹിച്ച്
നിഴലിനെ കൈപിടിച്ച്
കര്‍മ്മകാണ്ഡങ്ങളെ അളന്ന്
പകുത്തുവയ്ക്കുന്നുണ്ട്
സ്നേഹത്തെ.

വാവട്ടംകുറഞ്ഞ
മണ്‍ഭരണികളില്‍
നിന്ന് ഇരുട്ട്
കുരുക്ഷേത്രഭുമിയില്‍
പരന്നിറങ്ങുന്നുണ്ട്

മുടിയിഴകളില്‍
ചോരയും ചലവും ചേര്‍ത്ത്
ജടാഭാരത്തെ ആവാഹിച്ചൊരു
യുദ്ധവെറിയാല്‍
അട്ടഹസിക്കുന്നുണ്ട്

മഴ...
ചില ചരിഞ്ഞ പ്രദേശങ്ങളില്‍
അണയെടുത്ത് ഉരുള്‍പൊട്ടലായി
തിരകാണാത്ത തീരങ്ങളെ
ഭോഗിക്കുന്നുണ്ട്...

മഴ..
പെയ്തുകൊണ്ടേയിരിക്കുന്നു