മിന്നലപൂക്കും നിന്‍ കണ്ണിണച്ചുണ്ടില്‍
ഒരു ചുംബനത്താലെന്‍ മനസ്സുപൂക്കേ
ഹൃദയംനിറച്ചൊരു ജാലകവാതില്‍ നീ
മണിയറയ്ക്കുള്ളിലായ് തുറന്നുവയ്ക്കും
മന്ദസ്മിതത്തിന്‍റെ കുളിരുള്ള തേന്മഴ
എന്‍വഴിത്താരയില്‍ചേര്‍ത്തുവയ്ക്കും
ഒന്നുതൊട്ടൊന്നുതൊട്ടീമലര്‍മേനിയില്‍
മഞ്ഞലചാര്‍ത്തൊന്നുഞാന്‍വിരിക്കും
നെഞ്ചഴകാംനിന്‍റെ കുഞ്ചിരോമങ്ങളില്‍
ചുംബിച്ചുഞാന്‍ നിന്നെ വ്രീളയാക്കും
പല്ലാല്‍ക്കടിച്ചനിന്‍ചുണ്ടിണചുംബനം
ചുണ്ടാല്‍നുകര്‍ന്നുഞാന്‍ സ്വന്തമാക്കും
തൂമഴപെയ്യുന്ന തേനറപോലെനിന്‍
പൂവിതള്‍ പെയ്യുന്ന നേരമെത്തേ
നഖക്ഷതച്ചിത്രങ്ങള്‍ കോറിവരച്ചെന്‍റെ
മേനിയില്‍ നീയൊരു നാഗമാകും
ദേവാംഗനകളങ്ങാകാശമേടയില്‍
നിന്‍കൊഞ്ചല്‍കേട്ടൊരു പാട്ടുമൂളും
മിന്നലപൂക്കുമാ കണ്ണിണച്ചുണ്ടില്‍ ഞാന്‍
ഹൃദയത്തിന്‍ നോവു പകര്‍ന്നുവയ്ക്കും
എന്നിട്ടെന്നീയുടല്‍ ഭൂമിയില്‍ വിട്ടിട്ട്
നിന്‍ചിറകേറിഞാന്‍ സ്വപ്നമാകും
എന്നുടല്‍നേദിച്ചു യാത്രയൊരുക്കുവാന്‍
ബന്ധുക്കള്‍ പൂങ്കനല്‍ കോര്‍ത്തുവയ്ക്കും
No comments:
Post a Comment