Tuesday 27 October 2015

ഒഴുകുവാനാകില്ല പുഴയല്ല ഞാന്‍


ഒഴുകുവാനാകില്ല പുഴയല്ല ഞാന്‍ വെറും
ചലനമില്ലാത്തൊരു കല്ലുമാത്രം
ഒഴുകുക നീയെന്നില്‍ ചിതറിച്ച മുത്തുമായ്
ഉറയട്ടെ ഞാനൊരു തല്പമായി
നിന്‍ചിരിയെന്നിലെ നോവുള്ള സംഗീതം
നിന്നലയെന്നിലെ ചിരിയഴകും
കളമിട്ടെഴുതുന്ന നാഗത്തറയിലെ
നാഗമായ് നീയെന്നില്‍ വന്നുചേരേ
കളമതുമായ്ക്കുമാ രതിയിലെന്‍ സംഗീതം
ഉടല്‍തൊട്ടറിഞ്ഞുഞാന്‍ മയങ്ങിടുന്നു
ഒരുവേള നീയെന്‍റെ നഖഷതക്കുളിര്‍മയില്‍
മിഴിപൂട്ടിയൊരു ഗാനം പകുത്തുവയ്ക്കും
ഉടല്‍മാഞ്ഞുപോകാതെ ഒരു സ്വപ്നമാകാതെ
കൂടെയെന്‍ പ്രണയവും ചേര്‍ന്നുപാടും
കണ്ണറിയാതെയെന്‍ മനമറിയാതെ നീ
തന്ത്രിയായെന്‍വിരല്‍കട്ടെടുക്കും
ഒഴുകുവാനാകില്ല പുഴയല്ല ഞാന്‍ വെറും
ചലനമില്ലാത്തൊരു കല്ലുമാത്രം

No comments:

Post a Comment