ഞാന്‍ എഴുതിത്തുടങ്ങുകയാണ്
എവിടെ അവസാനിപ്പിക്കണമെന്നറിയാതെ
മുത്തശ്ശിചൊല്ലികേള്‍പ്പിച്ച
രാമായണകഥയില്‍
ഞാന്‍കേട്ടത്
മാനുഷരായ
രാമലക്ഷ്മണന്മാരെക്കുറിച്ചല്ല
എന്‍റെ മനസ്സില്‍ നടക്കുന്ന
ദേവാസുരയുദ്ധത്തെക്കുറിച്ചാണ്
ഇതുവരെ ഞാന്‍
മനസ്സിലാക്കിയിട്ടില്ലാത്ത
തത്വബോധത്തെക്കുറിച്ചാണ്
ഇപ്പോഴും
ഇടങ്ങഴിപാല്‍ക്കണക്കുമുതല്‍
അണ്വായുധങ്ങള്‍ വരെയുള്ള
യുദ്ധബീജങ്ങളുടെ
ചേരിപ്പോരുകളെക്കുറിച്ച്
ഇനിയും കേള്‍ക്കണം
ദേവന്‍ ജയിക്കുകയോ
അസുരന്‍ മരിക്കുകയോ
ചെയ്യുന്ന രാമായണങ്ങള്‍
ചേല നഷ്ടപ്പെട്ടവളുടേയും
വെള്ളവും തറയും
തിരിച്ചറിയാത്തവന്‍റേയും
ഒളിഞ്ഞുനിന്നുയുധ്ധം ചെയ്യുന്നവന്‍റേയും
ശീലുകള്‍
പാതിവ്രത്യം ശീലിച്ച
മനുഷ്യസംസ്കാരത്തിന്‍റെ
പൊയ്മുഖകാഴ്ചകള്‍
അവസാന പദങ്ങള്‍
ആടിത്തീര്‍ക്കുമ്പോള്‍
ഞാനും അറിയരുതല്ലോ
പച്ചയാണോ
താടിയാണോ
മിനുക്കാണോ
അതോ കത്തിയാണോ എന്ന്
എങ്കിലും
ജന്മം വകവയ്ക്കാത്ത
നീര്‍ക്കുമിളപോലെ
ഞാനും ഒന്ന്
പരന്ന് സഞ്ചരിക്കട്ടെ
ഇനിയും ഒരു വേടനെത്തുമോ
അടുത്തപുരാണത്തിലെ
ദേവനെക്കൊല്ലുവാന്‍
No comments:
Post a Comment